ኣብ ኬንያ ኣብ ትሕዝቶታት ቲክቶክ ቁጽጽር ክግበር ኣብ ስምምዕ ተበጺሑ

19 ነሓሰ 2015 ዓ.ም

ኬንያ ትሕዝቶ ብቲክቶክ ኣብ ዝመሓላለፉ ቪድዮታት ቁጽጽር ክግበር ምስቲ ኩባንያ ከም ዝተሰማምዐት ኣፍሊጣ። እቲ ውሳነ ቅድሚ ሒደት መዓልታት ሓደ ውልቀሰብ “ቲክቶክ ዘይግቡእ ቪድዮታት ይዝርግሕ” ኣሎ ብዝብል ምኽንያት ክእገድ ናብ ባይቶ እታ ሃገር ድሕሪ ዘቕረቦ ጥርዓን ስዒቡ ዝመጽአ ምዃኑ ድምጺ ኣሜሪካ ኣብ ጸብጻቡ ኣዘኻኺሩ። ብመሰረት እቲ ስምምዕ፡ “ዘይግቡእ” ዝተባህሉ ቪድዮታት ካብቲ መድረኽ ክእለዩ እዮም። ብተወሳኺ ፈጻሚ ስራሕ ቲክቶክ ሾ ዚ ችው ኣብ ኬንያ ቤት ጽሕፈት ብምኽፋት ኣብ ኣፍሪካ ትሕዝቶ ኣብ ቲክቶክ ዝጥቅዑ ቪድዮታት ክከታተል ምዃኑ ገሊጹ።

ሶማልያ ቲክቶክን ቴሌግራምን ከም ዝኣገደት ኣልጀዚራ ጸብጺቡ። እታ ሃገር እቶም ማሕበራዊ መራኸቢታት ናይ ሓሶትን ዝንቡዕ ሓበሬታን ከምኡ’ውን ኣጸያፊን መናዓብን ትሕዝቶታት ዝዝርግሓሎም መድረኻት ኰይኖም’ዮም ብዝብል ምዃኑ እቲ ጸብጻብ የመልክት። ኣብ ሶማልያ ኣገልግሎት ቴሌኮም ዝህቡ ኩባንያታት ካብ ሕጂ ንደሓር ቲክቶክን ቴሌግራምን ንክእግዱ መምርሒ ተዋሂቡዎም ኣሎ።

ፕረዚደንት ኣሜሪካ ነበር ዶናልድ ትራምፕ ድሕሪ ክልተ ዓመት ናብ ኤክስ (ብትዊተር ዝፍለጥ) ተመሊሱ። ፕረዚደንት ትራምፕ ቅድሚ ክልተ ዓመት ነቲ ትዊተር “ተግባራት ዓመጽ ምልዕዓልን ምትብባዕን” ዝብል ፖሊሲ ትዊተር ብምጥሓሱ ተኣጊዱ ነይሩ። ቢልየነር ኢለን መስክ ነቲ ማሕበራዊ ሚዲያ ካብ ዝዕድጐ ንድሓር እገዳ ትራምፕ ጌጋ ምዃኑን መሰል ሓሳብካ ናይ ምግላጽ ናጽነት ዝጥሕስን ምዃኑ ብተደጋጋሚ ክገልጽ ጸኒሑ ኣሎ።